صانع النجوم

النهاردة معاد تسليم الشغل للعدد الإسبوعى وكالعادة لسة مفيش أخبار. فتحت دفتر أرقام التليفونات علشان اتصل بأى مصدر أجيب منه خبر لكن للأسف قفلت الدفتر مرة تانية لأنى اكتشفت أن الحرارة مسحوبة من التليفون لأنى مدفعتش الفاتورة وكمان الموبايل عايز شحن رصيد. فتحت المحفظة وفتشت بسرعة على أى فلوس.. ايه ده اربعة جنيه بس؟! ده اقل كارت شحن بخمسة جنيه لبست هدومى بسرعة ونزلت على محل الموبايلات اللى ناصة الحارة.. إيه ده ؟! الواد سيد اللى بيشتغل فى المحل بيبص لى بغيظ كدة ليه؟؟ اه نسيت ان انا اديته بمبة الواد عايز يمثل فى السيما و خليته يظهر مع الكومبارس فى فيلمين تبع واحد رجيسير صاحبى ووعدته أخر مرة انى هاجيب له دور اكبر فى فيلم وطبعا نسيت الموضوع من دماغى ودلوقتى مش هايرضى يشكك لى حق كارت الشحن لكن ولا يهمنى. الهجوم أحسن وسيلة للدفاع.. رسمت الغيظ والزهق على وشى ودخلت عليه وبصوت عالى زعقت فيه: جرى إيه ياسى سيد لما انت لسة فى أول طريق النجومية وبتعمل حركات قلة الأصل دى فينا أمال لما تبقى نجم ها تعمل فينا إيه يا أخى عيب عليك كدة وطول ما انت نيتك وقلبك وحشين كدة عمر ربنا ما يفتح عليك وها تبقى حاجة.. بص لى سيد فى دهشة وبلاهة وطبعا مش فاهم أى حاجة. استغليت الموقف وقعدت ألف وأدور حواليه وأنا بضرب كف بكف والواد سيد بيلف معايا بالكرسى مش فاهم حاجة. وقفت ووطيت عليه وعنيا بتطق شرار تقدر تقول لى قافل تليفونك ليه طول النهار وساعة ما تفتحه ما بتردش على مكالماتى ليه؟ الله يسامحك ضيعت على نفسك فرصة العمر الأستاذ خالد يوسف المخرج بعد ما قعدت أتحايل عليه أيام وليالى وشهور علشان خاطرك وعلشان يديلك فرصة فى فيلمه اللى بيصوره و أخيرا وافق وكان عايز يكلمك بنفسه علشان يديلك الدور لكن سيادتك عايش فى دور النجوم ومش بترد على حد.. اهو جت على دماغك.. انتفض سيد من على الكرسى وهو فى غاية الاندهاش معقول يا استاذ شحتوت خالد يوسف المخرج بنفسه بس أنا والله ما حصل انا امبارح تليفونى مفتوح طول اليوم ومقفلتوش خالص وحتى شوف الموبايل قدامك أهو مفيش ولا مكالمة من حضرتك.. رديت بسرعة: طبعا مفيش ولا مكالمة منى لأن رصيدى خلص ومكانش قدامى محل أشحن منه وكنت بكلمك من تليفون واحد تانى. يعنى مش كفاية بنجرى على مصالحكم وكمان بنغرم وبندفع من جيوبنا وانتم عايشين فى وهم النجومية. أخذ سيد يتوسل لى: طب وحياتك يا استاذ إيه الحل دى فرصة عمرى. أكيد الأستاذ خالد يوسف كان شايفنى فى دور كويس قدام سومية الخشاب انا كنت قريت فى الجورنال انه بيدور على وجه جديد يلعب دور جديد قدام سومية الخشاب... ياااه.. اما حتة فرصة بس إيه النحس ده.. ساعدنى ابوس إيدك يا أستاذ.. اعتدلت فى وقفتى ونفضت تراب مكانش على صدرى وبكل ثقة فهمته أن الموضوع خرج من إيدى خلاص ومفيش أمل لكن أنا ها حاول أعمل اللى عليا من تانى واتحايل على خالد يوسف علشان يستعين بيه مرة تانية بس المشكلة الوحيدة قدامى هيا موضوع شحن كارت الموبايل علشان الظروف الطارئة اللى زى دى. وبدون تفكير أو تردد اسرع سيد إلى درج المكتب وأخرج مجموعة من كروت الشحن ووضعها فى يدى قائلا: مفيش مشكلة ولا حاجة يا استاذ شحتوت خد الكروت دى وخليها معاك لوقت اللزوم والطوارئ بس مش هاوصيك يا استاذ وحياتك حاول تانى مع خالد يوسف دى فرصة مش ها تتعوض وانت عارف كمان انا بحب سومية الخشاب قد إيه أرجوك يا استاذ.. أرجووووووووووووووووكأخذت الكروت بعدم اكتراث وهزيت راسى فى أسى وغادرت المحل وتركت سيد ينعى حظه.